香港滾軸溜冰運動員王蘊妮身形嬌小有著數
- Bear Bear Post
- 8月26日
- 讀畢需時 2 分鐘
ViuTV節目《全運港將》逢星期一下午5時30分播放，今日（25日）播出的一集，請來未到4歲已開始接觸滾軸溜冰，直到15歲全港公開賽摘下冠軍後，全力專注於速度滾軸溜冰的中國香港速度滾軸溜冰運動員王蘊妮（Mimi）。
對於速度滾軸溜冰運動，嬌小的Mimi坦言自己身形確有優勢：「因為我哋個運動要坐得低，所以其實細粒啲係有著數，同埋會靈活性高啲，即係瓹嚟瓹去、搶位就會好啲。」Mimi笑稱：「高大嘅運動員好唔鍾意跟喺我後面，因為我擋唔到風㗎！」
練習方面，由於香港的配套設施不足，所以Mimi經常要到外國訓練：「我哋嘅比賽場地要200米，而且要有坡道，所以我以前會去台灣訓練，疫情之後就開始去歐洲訓練。歐洲其實有好多其他嘅比賽，咁我除咗可以訓練上好啲，我又可以吸收更加多比賽經驗。」至於亞洲、歐洲和南美的速度滾軸溜冰在文化上有何不同，Mimi直言有很大分別：「例如比賽方面，亞洲區嘅運動員比賽斯文啲嘅，咁所以好多時候我喺亞洲區比賽呢都係安全到達。歐洲同南美嗰邊會比較aggressive一啲，有時會搲呀、擋呀，或者會阻住唔畀你入。」被問到會否擔心留下疤痕時，Mimi表示：「我塊面ok就ok喇！所以每一次仆親，啲人話點解你淨係仆隻手嘅？因為第一時間我會護住塊面。有一次我真係好彩冚住自己塊面，因為我手背骨裂咗，如果唔係就會撞到塊面。」
而講到印象難忘的比賽，Mimi指是2023年的杭州亞運會：「因為香港淨係派咗我一個女仔去，跟住中國隊就連派都冇派到，所以我一去到上線嘅時候，我好似主場咁樣囉，一嗌到我個名嘅時候，全場起哄，嗰一刻好震撼。跟住我心諗，唔可以樣衰，我要盡力盡力。最後我10000米積分賽有第六，我都好開心。」
對於快將舉行的全運會，Mimi表示雖然兩個月前斷了鎖骨，但自己在康復期間一直也有做運動：「因為我唔想冬天練咗嘅嘢一下子冇晒，上個月我去咗歐洲訓練嘅時候，我feel到自己狀態都比我預期中好嘅，所以我比較正面嘅，同埋我覺得我有機會爭牌囉。」
留言